Gurize

La vile "quae Sclavorum lingua vocatur Gorizia" (“che inte lenghe dai Sclâfs e je clamade Gurize”) si cjate pe prime volte tal document dal 28 di Avrîl dal 1001, li che l'imperadôr Oton III al regalave metât dal cjistiel e dal teritori di Salcan cu la vile di Gurize al patriarcje Zuan II, e chê altre metât al cont Verihen dal Friûl. Tal 1117 il feut al deventà possediment di Marquart di Eppenstein, avoiâl de Glesie di Aquilee. Daspò il cjistiel al fo slargjât in mût pareli cul cressi dal lustri de famee. Lis vicendis militârs e familiârs alternis e lis diviersis aleancis a puartarin la contee intal cercin dal  Imperi, cussì che tal 1500, cuant che al murì Leonart, l’ultin cont di Gurize, il feut al fo cjapât di Massimilian I di Asburc. Chel al infuarcì ancjemò di plui il cjistiel ma nol rivà a fermâ lis miliziis venezianis che lu cjaparin tal 1508 e che dut câs lu tignirin dome par un pôc timp. Destinât a caserme e a preson tal secul XVII, al pierdè grande part de fisionomie medievâl. Bombardât vie pe vuere dal 1915-18, al fo tornât a fâ sù fra il 1934 e il 1937, cirint di puartâlu di gnûf aes struturis dal Cinccent.