Pordenon

Za tal 1202 e veve di esisti une difese, stant che i pordenonês a forin in stât di resisti al patriarcje Pelegrin e tal 1273 e je documentade la esistence dal cjistiel, ma il toponim Portus Naonis si riferìs a une origjin plui antighe. Deventât contee, Pordenon al fo concedût al futûr imperadôr Albert che, tal 1314, lu vendè a Lodovì di Purcie; di chê volte Pordenon al passe di une famee a chê altre fin al 1387, cuant che al rive in man a Francesc di Carare, leât ae Cjase di Austrie di relazions di parintât. Par dut il Cuatricent, la situazion no fo trancuile e di cheste continue tension e aprofità la republiche venite che tal 1508 e cjapà possidence de citât, infeudant il condotîr Bartolomeu di Alvian. Cuant che il fi Livi al murì, stant che al jere cence erêts, Vignesie e tornà a cjapâ il podê su la citât, nomenant un proveditôr cjapitani par che le guviernàs; le mantignì però simpri autonome dal rest de  Patrie. Inte citât, siore di viodudis sugjestîfs e di cjasaments preseabii, al è ancjemò il cjistiel, trasformât in preson, e cualchi rest des difesis antighis.