Raviei

Logât insom dal Cuel Budin, i rescj dal cjistiel di Raviei purtrop vuê no nus dan masse indicazions su cemût che al veve di jessi une volte chest complès difensîf. Lant sù pe cueste setentrionâl de mont si viodin i rescj di une torisele cuadrade, che e controlave la vie di acès al lûc fortificât. Altris rescj di mûr, che si vualmin cun dificoltât sot des fueis coladis e de tiere, a somein cuasi cenglâ par un biel toc il cuel cun cerclis concentrics. In fin, insom si pues rimirâ ce che al reste de opare difensive, cun blocs scuadrâts metûts di cjanton.