Castello di Colle Mazeit (Verzegnis)

Dai mûrs ancjemò in pîts dentri di un cercli di cuasi un chilometri si pues pensâ che al fos un dai centris fuarteçâts plui impuartants de Cjargne. Ce che al vanze si lu cjate sù pes rivis e su la piche (a 509 mt. di cuote) dal cuel Macêt, tra il Tiliment e la valade di Vile di Verzegnis.
Lis ricercjis a àn mostrât la sistemazion in tarde ete romane di un ambient che al esisteve za e che si poie tor de cente dai mûrs, che si davuelç dilunc dal ôr de plane plaçade subit a sud de tor-bastion medievâl.
I sgjâfs archeologjics cumò in vore a àn permetût di cjatâ ogjets de ete neolitiche, medievâl, romane (de tarde republiche e de prime ete imperiâl), dal periodi celtic, langobart e bizantin.